劉亦菲晒10年閨蜜情　臉貼臉合照煞盡全場

內地頂流女星劉亦菲近日憑劇集《玫瑰的故事》再創事業巔峰，一舉一動都備受矚目嘅佢，更頻頻登上熱搜掀起熱話。而不時透過社交網同粉絲分享生活點滴嘅佢，日前更晒出同好友唐嫣嘅合照，並分享道：「下班前 and 下班後」，幾乎臉貼臉嘅親密合照，亦引嚟唔少網友留言道：「兩位大美女，美的各有特色！」、「終於又等到久違的合照啦！」、「美女們貼貼好養眼呀！」'「兩位姐姐友誼長存！」外，更有唔少網友許願希望2人可以再次合作：「能不能蹲個二搭，期待期待！」

據悉，劉亦菲同唐嫣因2014年拍攝《露水紅顏》相識結緣，加上唐嫣丈夫羅晉係劉亦菲嘅大學同學兼好友，2人繼而拉近關係成為密友，如今10年過去，2人感情依然親密無間，並會喺對方生日主動獻上祝福外，唐嫣更為劉亦菲新劇Po文宣傳道：「這部劇絕對是2024年初，我看過最正面能量滿滿的高質量電視劇，好劇，值得細品好幾遍。」