吳彥祖親揭荷里活片場頹飯　菜都冇慘過兩餸飯

型男吳彥祖最近喺荷里活拍攝新片《With Love》，同片有奧斯卡最佳男配角關繼威，去到美國拍大片，吳彥祖就決定同大家分享荷里活嘅工作生活，尋日（2日）佢就喺短片平台上載片場伙食，估唔到一個飯盒就足夠震驚網民！

片中吳彥祖去到Canteen拎嘢食，最後佢個飯盒只有肉球同白飯，佢忍唔住問阿姐有冇蔬菜，結果連半條菜都冇，慘過食兩餸飯。之後吳彥祖就解釋，其實係佢遲咗去canteen，食物幾乎已經畀其他人拎晒，平時應該冇咁陰功。此外，佢又公開片場演員休息室環境，麻雀雖小，五臟俱全，不過見佢咩雜物都冇，似乎都少用間休息室。