吳業坤撇甩老婆　孖「港產」AV女優甜蜜遊日

歌手吳業坤自2022年娶得日本老婆濱口愛子，成為人夫後的他，杜絕一切緋聞，修心養性，努力工作養家，兩夫婦相當恩愛。不過近日吳業坤竟然撇甩老婆，孖「港產」日本著名AV女優相澤南到日本「約會」食好西！

原來兩人是到日本拍攝旅遊節目，眾所周知吳業坤熱愛日本文化，曾在2021年與周奕瑋一同主持節目《#好掛住日本》，而近日他們再度合作拍新節目《感動味蕾美食餐廳100強－關西篇》，不過今次兩人就兵分兩路，分別孖兩位靚女王敏奕與相澤南到日本品嘗各式美食。節目日前釋出《獨食好西》宣傳片，片中所見，吳業坤發揮其婚前撩女的本色，不時玩食字Gag，冧得相澤南相當開心，之後更與相澤南談論「好西」，認真大膽！兩人在片中表現甜蜜，還互相餵食，一同頭貼頭自拍，開心到似乎已經忘記家中愛妻，「坤嫂」在港獨守空幃，真係慘慘豬！