賈靜雯爆改新Look曝光　不羈少女造型勁回春

台灣影后賈靜雯，出道逾30年嘅佢一直以黑長髮御姐Look示人，而不時透過社交網同網友分享生活點滴嘅佢，日前就晒出段「染髮6小時」嘅短片，透露自己人生第一次挑戰「辣妹造型」，只見將頭髮漂足3次嘅佢，從27日夜晚7點開始坐到28日凌晨3點左右，雖然中途一度攰到瞓着，但最後嘅成果亦令佢相當滿意道：「迎接我的暑假～當個辣妹！好喜歡我的新髮色，挑戰成功！好棒棒。」

賈靜雯將純黑長髮變成霧灰色及肩短髮嘅片段，引嚟唔少網友留言道：「辣～～個妹妹！撥髮瞬間直接被電暈！」、「長得漂亮怎樣染都好美喔！」、「原以為會變粉色嚇一跳，結果超美！」、「好好看的顏色～好適合你！」