蔡思貝為何雁詩「獻身」　大讚其囝囝係天使

藝人蔡思貝昨晚（7號）現身由歌手鄭俊弘（Fred）及太太何雁詩（阿詩）任發起人的籌款騷《天使綜合症慈善演唱會》，和何雁詩同是姊妹團SIXTERS的成員，而她亦是阿詩兒子Asher的契媽，思貝表示自問未有能力為阿詩兩夫婦上台獻唱籌款，惟有落力在推銷其義賣T恤及環保袋，她說：「唱歌唔係我專長，希望用我丁點力呼籲多啲人捐款，令阿詩佢哋籌到更多善款，（有冇見契仔？）呢排冇，因為佢哋兩夫婦為呢個演唱會好忙，所以冇帶小朋友出嚟玩。」

問到Asher的病情？她透露：「佢ok嘅，因為佢成日笑，真係一個天使咁。（心痛阿詩壓力大？）梗係有啦，初初知道呢個消息時，有種心痛同無助嘅感覺，知道件事但又冇辦法去幫到佢，我一路以嚟就見到個好強嘅媽咪囉，我次次見到阿詩都以佢為榮，佢處理得好好，作為朋友叫佢加油，希望所有事都可以好起嚟。」同時她亦讚Fred是好爸爸，因他和阿詩會用盡任何方法，令囝囝在最健康及開心的情況下成長。