胡歌感激愛妻獨自湊B　生完女《繁花》都未拍完

內地男星胡歌因拍攝由神級導演王家衛執導電視劇《繁花》而再次爆紅，去年1月佢亦突然宣布已婚及做人父，震驚外界，不過佢對圈外人太太極盡保密，至今仍從未post過合照。雖然大家已經知道太太係佢嘅前執行經理人黃曦寧，夫妻相差11歲，不過本人始終未證實。而近日胡歌喺內地節目上，竟罕有地提起自己同妻子相處狀態以及家庭關係，一改以往封口態度。

胡歌喺內地綜藝《斯文江南》中，佢被問到如何處理家庭關係時？佢就輕鬆回應：「現在沒有甚麼問題需要處理，其樂融融。」難得開口談家事，主持人再追問佢同太太嘅相處模式，佢就透露喺愛女出世後，自己都仲拍緊《繁花》：「所以差不多前半年都是太太在照顧孩子、在持家，付出了很多。」依家佢都仲係學習緊如何令家庭健康、持續維持和諧，指係要好有智慧。《繁花》由2020年開鏡，一直拍到2023年，難怪胡歌嘅兩件人生大事，都喺拍攝時完成。

節目片段曝光後，網友紛紛留言「胡歌真是家庭事業雙豐收，人生贏家！ 」、「這是實在話，目前看來，胡歌做得很好」、「家庭相處模式很和睦，這種男人很好」。