陳豪狂接廣告片　第6間咖啡店開張帶陳茵媺去威

視帝陳豪形象健康又愛妻，好多代言爭住搵佢做，豬籠入水嘅佢早年已經開咗咖啡店，依家生意愈做愈大，上周佢就拍片表示逆市擴充開分店，第6間Coffee shop已經開張！佢帶埋港姐冠軍太太陳茵媺一齊做生招牌，企喺舖頭勁影相，陳茵媺仲着住短裙仔晒長腿，啲合照又Sweet又溫馨。

陳豪要撐住6間舖，梗係要先搵錢儲資金，其中一個方法就係收錢出廣告片，而陳豪早前就趁舉家飛上海宣傳新劇時，就快快手拍咗條麵包店廣告片，佢仲換上內地中佬Look，配合晒內地市場口味。佢喺片中就話要買麵包畀一家人做早餐，演技十足真係似拍vlog，唔怪得佢可以一轉身就賺到流量同拍片費，先可以供到咁多間舖。而近日陳茵媺就帶同幾位小朋友去加拿大多倫多旅行，等老公開工都唔使愁湊仔嘅問題，確係諗得周到。