為氹歐陽妮妮歡心　男友張書豪戒18年煙癮

台灣女星歐陽妮妮同張書豪2018年因劇結緣，穩定交往多年後亦於早前傳出求婚成功嘅好消息，引嚟唔少粉絲祝福外，曾經應承歐陽妮妮會戒煙嘅張書豪，日前亦透過社交網分享戒煙經歷，並感性表示：「雖然我可以少愛自己一點，但我想陪愛的人久一點。」

張書豪喺社交網透露自己即將戒煙兩個月，目前冇任何不適狀況外，自己亦冇去任何戒煙門診求助或使用任何輔助產品，而戒煙唯一需要嘅則係「自己真心想戒。」張書豪亦坦言，以前戒煙失敗最大原因係冇動力，所以每當有拍戲空檔、飽餐後、大便前後及心情好壞時：「這些時刻都會好想來一根，當然沒多久就失敗了。」並提到身邊成功戒煙嘅朋友共通點，都係話戒就戒之餘，張書豪亦提到自己最後一次戒煙，係一次過連食3支煙：「接着跟這位認識了18年的壞朋友說：『認識你曾經覺得自己很酷很帥。』現在想想，有了伴只想陪久一點誰管你帥不帥。」引嚟唔少網友留言大讚：「為你感到開心。」、「成功戒煙好MAN！」、「為了愛你的人，絕對要堅持到底！」、「是因為愛的力量。」、「自律的男人。」