張敬軒不忍粉絲日曬雨淋　重定接Job原則

歌手張敬軒（軒仔）貴為歌王級嘅佢，雖然出道多年人氣高踞不下，但將粉絲視為知心好友嘅佢，仍不時透過社交網同粉絲分享生活點滴，甚至對粉絲喺留言區嘅許願，都有求必應，認真錫粉絲。而日前（12日）出席公開活動嘅佢，現場就引嚟大批粉絲一早到場守候，不過炎炎夏日嘅戶外排隊，就令軒仔相當心痛粉絲，並決定重新制訂接受工作邀請的原則，希望對方可以以照顧好粉絲嘅前提下安排活動：「尋日咁熱，一陣曬一陣落雨，大家喺度等咁多個鐘頭，見面就見嗰幾分鐘，我夜晚收工返到屋企自己一個坐喺度諗咗好耐，我好感恩，但係又好內疚。我同歌迷會會重新制訂我哋嘅接受工作邀請原則，如果會邀請大家出席嘅話，我哋同客戶都會以照顧好大家為Priority。多謝大家嘅愛，你哋嘅愛好偉大！多謝尋日到場嘅每一位朋友，你哋為我帶嚟嘅，遠比你哋自己想像到嘅，要多得多。祈求神祝福你哋每一位，今日係安息聖日，祝大家今日有平安、開心、健康！」