宣萱獲攝影師周柏豪點名力讚　由心敬佩專業堅持

藝人宣萱出名拍攝專業演技好，平時個人又夠貼地，最近佢再有敬業事迹被公開，日前有位攝影師周柏豪分享同一位入行多年、具分量、人靚演技好嘅女演員嘅一次合作經歷，就成功引起大批網友嘅討論。

攝影師周柏豪發文指，為拍攝效果，通常女藝人都會以高踭鞋上陣，大多女藝人等埋位時，就會換上平底鞋休息，不過嗰次佢同宣萱合作時，就出現咗令人難忘嘅一幕。周柏豪提到當時因為需要拍攝佢嘅上半身照，到正式埋位前宣萱都仲着住平底鞋，正當周柏豪表示可以埋位，宣萱即表示：「咪住！我未着高踭鞋。」周柏豪就解釋：「呢個shot影唔到腳，唔需要換鞋。」

如果平時女藝人聽到攝影師咁講，都會唔換鞋繼續拍攝，不過宣萱反應就特別不一樣，佢當時就堅持：「唔得，影相一定要full set上陣。」堅持專業嘅態度瞬間令周柏豪感動，對佢非常佩服：「立刻畀佢呢句說話打動咗，我真係好耐冇聽過有星或者model會有呢個執着。我立刻由心敬佩。呢位女藝人叫做：宣萱。」果然細節見專業，認真態度無人能及。