32D邱晴處女寫真遇勁敵　台妹打孖胸襲上陣

藝人邱晴（晴晴）擁有天使面孔魔鬼身材，她將於書展期間推出處女寫真，以超過15個不同造型上陣，當中有多個性感水着look大騷Big爆上圍，配合甜美笑容與無辜樣，又純又欲，要純情有純情，要青春有青春，全都由男友視覺出發。

除了本地薑之外，今年也有過江龍推出寫真，當中兩位台灣啦啦隊女神岱縈（Ying）及紫庭（Chloe）就孖住一齊出寫真，兩人最近成為泳衣品牌代言人，書中有大量水着造型，岱縈更會於7月21日到書展，近距離跟粉絲們見面簽名。

岱縈有「零死角女神」之稱，擁有白皙肌膚及可愛的臉蛋，深深的小酒窩配上甜度超標的笑容，早前更入圍美國網站TC Candler的全球百大美女，至於被譽為「甜音精靈」的紫庭亦不遑多讓，長相甜美、有一雙迷人電眼，從大學開始一直就是系花，而且嗓音清亮，歌精舞勁！

麥紫莉剝到最盡一次

此外，近年已退出娛樂圈的麥紫莉（Chili）今年亦加入寫真女行列，在外修讀多個課程試圖轉行，但對娛樂圈充滿憧憬的她，始終想為夢想行多一步：「呢幾年讀咗中醫、營養學，一來想身形靚啲健康啲，二來真係有諗過轉行，因為娛樂圈收入唔穩定，有冇得開工又唔係自己話到事；當我真係有資格轉行喇，我發現我都係想試多一次！於是我主動搵人傾出寫真嘅可行性，反正我嘅身形，即使收收埋埋，大家嘅焦點都會放返喺身上，咁不如我買一鋪大細放手一搏！」

人生第一本寫真可算是Chili剝到最盡的一次，「真空」又「真胸」，絕無照騙，因為她想大家感受到最坦蕩蕩的一面，由真空着圍裙、在沙灘又跪又爬全無say no，而且她亦參考日本AV女的招牌誘人動作，務求大家對她有一定記憶點：「都已經27歲，如果唔趁依家come back，再大啲就唔會再有呢份勇氣，我今次嘅心態係搏盡無悔，我唔介意大家定義我行性感，因為路線可以之後再改，好多女藝人以前都行過性感，拍過寫真甚至三級片，依家都一樣係賢妻良母啫！如果有機會，我一定會好好珍惜！如果大家都係唔接受我，我惟有認命退隱做番普通人囉！」