港姐2024︱吳芷靖為「吸煙裸露照」解畫：唔係冇着衫

無綫《2024香港小姐競選》15位入圍佳麗今日（15日）首度見傳媒，成為觀眾投票最高頭5位的10號佳麗吳芷靖，坦言有偷偷想過自己能打入頭5位，她感謝大家支持，直言對自己樣子有信心：「知道自己好靚嘅，可以代表到中國傳統嘅美。」

提到她的廣東話未夠好，她承認知道自己廣東話比較「輸蝕」：「都有好努力學習，依家都有進步，跟朋友學。」提到她的社交網有疑似性感裸露上身及吸煙照，她解釋自己喜歡拍照，年少時見網上興拍那類型便會跟風，但否認冇着衫：「如果唔着衫就唔會發出嚟畀人睇啦！」並強調照片中的香煙並沒有燃點，自己亦沒有吸煙習慣。