娛圈單打︱阿伯殺手爆不倫 跑慣江湖未驚過
2024年07月17日 00:01
東網電視
更多新聞短片
![](/hk/bkn/cnt/entertainment/20240717/photo/bkn-20240717000113488-0717_00862_001_01p.jpg?20240716234722)
參加第一季《中年好聲音》一炮而紅的龍婷,芳齡43歲小姑獨處,日前終於「出Pool」。「旺角小龍女」被指戀上大佢22歲的人夫,惹來非議。她被踢爆跟65歲已婚演唱會製作人丘亞葵有染,二人出雙入對還在車廂激咀,但最終否認緋聞。
他倆被直擊食飯撐枱腳兼睇戲直落,情到濃時,龍婷不僅在大庭廣眾輕拍丘亞葵籮柚,更在車廂主動獻吻。她曾自爆喜歡成熟穩重、事業有成的男士,丘亞葵可謂「合晒合尺」。不過男方已婚兼有一女,早前還孖住老婆出席公開場合。如今「東窗事發」,男方即時劃清界線,揚言只係朋友「Hello Kiss」啫。
哈哈,Goodbye Kiss就聽得多,Hello Kiss都係第一次,但點都好,男方擺明逢場作戲,亦已向老婆耍冧,龍婷今鋪都算食詐胡。佢就強調同男方只係朋友,相片拍攝角度引起誤會啫。
咁講啦,龍婷都唔係第一日跑江湖,早年曾在旺角街頭賣唱,未做「中一生」已參加央視《星光大道2019》並獲得總冠軍,唱腔激似鄧麗君,儲落一班死忠粉絲,尤其深獲叔叔伯伯喜愛,被網民形容為「阿伯殺手」。外柔內剛,見慣風浪,相信緋聞對佢嘅打擊唔會好大。
今次被爆同已婚製作人搭上,有冇動了真情,兼希望在事業上獲得助力,只有佢哋至知。淨係舊年,龍婷已最少兩次舉行慈善演唱會,佢亦不如其他「中一生」咁為大台賣力,顯見另有財路。再講,其感情生活一向神秘,小道消息傳佢曾經離婚兼有仔女。點都好,希望小龍女快啲遇到真命天子啦!