唐鶴德疑與新歡住昔日愛巢 張國榮被揭骨灰仍未下葬
2024年07月17日 17:01
東網電視
更多新聞短片
![](/hk/bkn/cnt/entertainment/20240717/photo/bkn-20240717170107685-0717_00862_001_01p.jpg?20240717234927)
一代巨星張國榮(哥哥)逝世21周年,哥哥生前摯愛唐鶴德(唐唐)每年均會發文紀念哥哥生忌及死忌,用情至深令人動容。如今唐唐已到65歲之齡,惟最近網上瘋傳唐唐與一名史姓男子互動親密,不但拍下大量頭貼頭親密合影,對方更疑似喺手上刺下「唐」字紋身,甚至住入張國榮生前同唐唐嘅愛巢,仲一同照顧新歡妹妹嘅小朋友,儘管戀情尚未獲得證實,仍引發網友熱議,事件更佔據熱搜位置。
張國榮粉絲對於傳聞難以接受,紛紛挖出唔少疑似唐唐及新歡嘅資料,粉絲推測早於2018年就疑似新歡史先生就已入住哥哥故居,史先生比唐唐年輕27年。唐唐與新歡被挖出嘅親密合照中,二人肢體接觸亦似超出一般朋友嘅親近,史先生亦多次將頭靠於唐唐身上。同時二人多次帶一位6歲左右小男孩出遊,唐唐同男孩關係融洽,網上即傳出二人疑似搵代孕所生嘅小孩,不過亦有指小朋友只係史先生妹妹嘅孩子。
但令一眾粉絲震怒嘅係,有指哥哥逝世至今21年,唐唐仍未將哥哥骨灰安葬,而係長置於哥哥故居之中。不過有粉絲翻查資料,指哥哥當年遺願係希望安葬於冇任何宗教背景嘅地方,不過由於香港幾乎所有墳場均屬於不同宗教團體,因此唐唐先會將骨灰置於家中。
有粉絲認為唐唐另結新歡舉,係背叛咗同張國榮嘅感情,亦辜負咗粉絲們嘅善良,覺得佢利用咗粉絲嘅情緒價值。不過亦有網友指出,唐唐多年來對哥哥嘅思念大家都有目共睹,認為唔一定要對方孤獨終老先代表佢對哥哥嘅愛,佢有權利展開新生活。