東方日報C1:姚焯菲與Gigi各有各做 唔急上位:驚跌番落嚟!
2024年07月18日 03:01
東網電視
更多新聞短片
![](/hk/bkn/cnt/entertainment/20240718/photo/bkn-20240718030116349-0718_00862_001_01p.jpg?20240717233713)
自「樂壇小天后」炎明熹被傳因合約問題遭無綫雪藏後,同屆「聲夢傳奇」的風頭躉姚焯菲被睇高一線,預告明年全力發展演藝事業,不過她未想過趁機攝炎明熹的位,因怕「突然會失去一切」,寧願循序漸進上位。至於隊友詹天文及鍾柔美公布DSE放榜成績,齊齊升呢做大學生。
出道2年多已被無綫打造成「小天后」的炎明熹(Gigi),自6月底傳因合約事宜遭掟入「雪櫃」,工作量及曝光率急降,雖近日似有「復陽」之勢,但合約未定,前景仍然未明;反而近年半以來,為學業不停新西蘭、香港兩邊飛的姚焯菲(Chantel),日前趁學校放假返港3星期,但工作已爆滿,除之後於麥花臣舉行兩場飛起Gigi的After Class演唱會外,又要宣傳合唱歌及處境劇《愛.回家之開心速遞》的主題曲,還要在澳門開騷及偕女團成員詹天文(Windy)與鍾柔美(Yumi)拍攝合唱歌MV。
對外籍追求者冇Feel
日前Chantel接受獨家專訪時表示:「每日差唔多都有工作,不過夾埋都有幾日假,晚上盡量陪Daddy、媽咪食飯。」談及此次回港最大任務是舉行After Class「三缺一演唱會」,她說:「好多Solo歌已經識,排舞都學得好快,我記性好好,全部記得晒。」她自認開騷經驗豐富,舉行過多個非個人演唱會,早已清楚音樂騷的運作,所以和兩位成員再開騷感覺放鬆。至於可有期待舉行個人演唱會?她希望明年成事,皆因她將全力發展演藝事業:「明年我讀大學,就算喺外國升學,假期會好長,起碼可以留喺香港7個月,同埋冇咁多功課同考試,會比之前做得更好。(追番之前啲時間?)只要個人喺香港就做到。」
現時Gigi或「暫休」,可視為上位好機會?Chantel揚言不會「乘人之危」,只會做好自己:「我又唔知佢係咪暫停,都冇收到通知,上唔上位唔係我決定,亦冇話專登依家要代替佢,呢啲嘢順其自然,我都明白機會要爭取,不過嚟緊嗰4個月,我要返新西蘭完成入大學前嘅最後課程,呢個(上位)機會未開始。」至於年僅17歲的她,可有視登上「一線女歌手」為目標?她則希望演藝事業能按部就班,因為很怕「失去」的感覺:「我唔想咁快到嗰個位,好驚自己會跌番落嚟,唔希望紅完就突然間啲人忘記咗我,所以依家唔會驚,因為我仲係向上望嘅階段,好多嘢要學習。」問到可意識到合約的重要性?她直言:「係,雖然18歲後可以自行處理合約,但會交畀大學必修法律嘅Daddy處理。」
談及在新西蘭讀書期間,可有初嘗拍拖滋味?直認仍是「A0」之身的Chantel曾遇外籍追求者,對方是同學的朋友,她謂:「係上年嘅事,佢幾高嘅,個樣都OK,佢透過同學向我表白,不過我冇回應,因為冇感覺。」她坦言不會為事業而放棄愛情,但心儀者尚未遇見。
詹天文收成績單開心到喊
至於應屆中學文憑試(DSE)考生Windy透露收到成績單後開心到喊,她說:「有種釋放嘅感覺,成績比我預期好少少。」又指外界雖覺得她將升讀有獎學金的美國柏克利音樂學院,但現時成績好,可有更多選擇,而理想的大學科目是主修音樂科或Music Business。另一成員Yumi就謂忙揀大學及心儀科目:「收到結果,可接受嘅,想同大家講,唔使擔心,會繼續做好自己,能夠做到自己嘅100分已經很好。」
更多新聞,請瀏覽東方日報網頁: