大S帶仔女飛韓國吸1億人睇　行慈母政策搶撫養權

台灣女星徐熙媛（大S）同前夫汪小菲離婚兩年，最近被揭二人和解官司冇進度，原因係對於家人嘅撫養接送以及可否返北京定居兩大關鍵，雙方尚未達成共識，不過依家趁暑期，雙方都急急帶一對仔女高調出遊，以證慈父慈母之形象。上次汪小菲同阿媽張蘭帶完小朋友去玩，今次到大S出招，佢同現任老公、韓團始祖「酷龍」成員具俊曄「一家四口」去韓國玩，大享天倫樂。

有網友指於韓國偶遇大S同具俊曄，兩人帶埋小朋友一齊去玩，圖中可見，大S梳住兩條辮仔、穿着低調，望落心情唔錯，狀態亦好好。有網友發現佢身上件衫索價1,000幾蚊及名牌包包，親子行都要靚靚。具俊曄同大S與前夫所生嘅一對仔女亦表現親切，更被拍得同囡囡小玥兒傾偈嘅一幕，一家四口溫情滿載，大S嘅慈母政策得咗！

不過大S見到旅行相上新聞後，佢淨係問咗經理人廖瑋琪一句：「弟弟、妹妹（兒子、女兒）的臉有沒有打馬賽克？」經理人答佢影到小朋友個樣，佢聽完就放心表示：「那就好。」

大S與具俊曄帶孩子現身韓國街頭被偶遇，另邊廂，前夫汪小菲與妻子Mandy合體直播，有網友問汪小菲知道大S帶孩子去韓國了嗎？汪小菲回應道：「我知道他們去哪了，不管去哪開心就好，當然我還是希望能帶他們回（北京）。」