何珮瑜做導遊帶好友遊故宮　清涼Look晒美腿搶Fo

藝人何珮瑜（Jeana）在北京出世，近年亦已返回家鄉定居，有工作才返港，理應對北京一切瞭如指掌，但日前卻發生了一個笑話，令她非常尷尬，她於社交網說：「做了一天一問三不知的導遊！」

Jeana於社交網上載了大批旅遊相，相中她帶領兩位朋友到訪故宮，3人笑容滿臉，齊齊於名勝內留倩影，想必行程相當愉快。由於北京時值盛夏，Jeana打扮清涼，貼身白Tee搭配牛仔短褲，將其姣好身材表露無遺，一對白滑長腿相當搶鏡。

記者事後聯絡上Jeana，她靦覥回應說：「都幾醜怪，我仲諗住盡地主之誼，一早訂晒門票同佢哋遊故宮，點知到訪內面唔同嘅宮殿時，朋友不停追問我史源，我真係完全冇頭緒，乜嘢都答唔知，後來就對住外門嘅雕刻字介紹，隨便讀一次俾佢哋聽咋，我呢個導遊梗係失禮又唔稱職啦。」