陳妍希代陳曉答係咩鄉下　網友瘋狂解讀微表情

台灣女星陳妍希同陳曉最近再次傳離婚，陳曉一直潛水選擇唔露面、唔回應，陳妍希雖然密密見人，但都係選擇封口。近日佢錄內地真人騷《五十公里桃花塢》時，被內地資深藝人宋丹丹問到佢老公係邊度人？佢就托住腮答「安徽人」，同場藝人王傳君亦補充話陳妍希老公係「曉哥哥」。估唔到佢一個簡單回應，有網友就認為呢個就係兩人仲未離婚嘅鐵證，仲話佢被問到陳曉時表情唔自然，不過亦有人潑冷水，指節目係預錄嘅，唔代表如今二人婚姻狀態，一個回應都有各種解讀。