炎明熹現身撐姚焯菲 Windy隨時唔喺香港升學
2024年07月21日 09:56
東網電視
更多新聞短片
![](/hk/bkn/cnt/entertainment/20240721/photo/bkn-20240721095624184-0721_00862_001_01p.jpg?20240721173041)
「聲夢」姚焯菲(Chantel)、鍾柔美(Yumi)及詹天文(Windy)於麥花臣球場舉行一連兩場演唱會,昨晚(20日)尾場星光熠熠,圈中好友包括冼靖峰(Archie)、林智樂(Felix)、林沚羿(Venus)及薛家燕等紛紛現身捧場,而尚未「解凍」的炎明熹(Gigi)亦坐足全晚支持好姐妹,離場時大讚「好睇」,她與無綫高層樂易玲分開前後行坐,未有正面交流。
約兩小時演出中3位歌手施盡渾身解數演出,勁歌熱舞之餘更樂器演奏,包括Chantel彈琴、Yumi吹色士風,而Windy則表演長笛。其後獻唱經典金曲包括《跳舞街》、《H2O》及《熱力自拍WouBomBa》等,成功炒熱全場氣氛。Encore環節唱到《給自己的信》時,Windy忍不住感觸落淚,3女又異口同聲感謝入行以來幫助過她們的人:「冇你哋嘅陪伴,我哋唔會行到呢一步。無論係由出道開始,又或者突然間某一個moment開始鍾意咗我哋,都好多謝你哋。望見到台下每一位《聲夢》學員,諗番起製造咗好多唔同嘅回憶。要多謝我哋嘅經理人團隊,尤其係樂小姐。」
完騷後受訪時,3女透露今次排練時間比較匆忙,事關要等Chantel從外國放寒假返港才能開始。至於整體表現,她們爽快表示一定合格,且自問已盡力,Windy補充:「首場得70分,我覺得今晚有80分,因為點都要有進步空間留畀自己,希望下次開騷再做得好啲。(最難忘係乜?)都係encore唱到《到此為止》及《給自己的信》嘅時候,因為覺得兩首歌都好似同自己對話、同粉絲講緊我哋嘅心聲咁,尤其《到》歌有種返番去開始嘅感覺,所以好感動。(你喊喎。)因為見到台下有唔同嘅手燈,又諗番起《聲夢》一開始嘅演唱會我哋都喺呢個場舉辦,覺得大家都長大咗唔少。」
談到Gigi特意前來捧場,她們形容很感動:「佢仲去咗後台搵我哋,叫我哋加油,又話好掛住我哋,我哋仲笑佢身上有陣香氣,原來佢特登買咗件新衫着住嚟捧場。(點解台上冇提佢?)因為rundown好密,所以以「聲夢」統稱啫。」談到與Gigi「合體」,Chantel淡然回應:「都係等公司安排,佢自己應該都有學業或工作上嘅忙碌,但我哋私底下有保持聯絡。(完騷同佢聚一聚?)希望有時間,不過我嘅寒假就快完,仲有個零禮拜就要離開香港。」
Yumi則透露想趁Chantel離港前,爭取時間拍新歌MV。Windy感性補充:「9月我就要同Yumi升大學,我自己都未知會唔會離港繼續升學,亦唔知日後大家會唔會身處唔同嘅地方,今次我哋3個一齊開到演唱會,仲見埋Gigi,真係好珍惜。」Yumi則自言對放榜成績不滿意:「有少少唔開心,呢幾日都喺度諗緊條路應該點行。(因為讀唔到自己想讀嘅科目?)可以咁講,我對自己都好高要求,依家面前好似好多選擇咁,會再深思熟慮。(想留喺香港讀書?)係,但要慢慢安排。」Chantel則指兩位好友日前放榜,搞到她亦心情緊張,又指返校後便要考試,9月22日18歲生日亦未能返港與粉絲慶祝,相信下次返港已是年底12月的事了。