容祖兒公開有「孖生兄弟」　自認專一唔會移情別戀

天后容祖兒出名玩得又有童真，最近佢就去開百貨公司，竟然發現有「孖生兄弟」小水怪Hangyodon！佢喺社交網上載多張靚相，見佢見到卡通水怪頭套時，佢仲笑言同自己撞樣，不過喜歡Miffy嘅佢，就斷言自己絕對唔會「移情別戀」，非常搞笑。佢寫道：「夜遊澳門donki，一班crazy guy當一齊去咗旅行啦，救我呀，笑到有腹肌 你睇吓你，我唔可以移情別戀愛上水怪㗎。雖然佢嘅五官好明顯係照住我來創作，肥咀仔同埋圓軲轆眼睛，但我最愛都係MIFFY，佢引誘唔到我㗎。」

相中見容祖兒戴上水怪頭套，仲玩到連個樣都唔見埋，僅露出口罩部份，並舉起V字手勢，佢身旁友人都狂讚：「係你嚟㗎，好靚呀！」唔少網民都留言讚女神玩得，比水怪可愛得多。