魏浚笙出動阿伯底衫搭港鐵　電梯旁被集郵勁危險

男神魏浚笙（Jeffrey）平時高大靚仔，去到邊都係萬人迷，佢亦深明「顏即正義」嘅道理，近日佢貼地出巡搭港鐵時，就以一身「阿伯底衫」feel嘅白色鬆身背心配運動褲現身，佢又戴上口罩，但都係難掩星光，被網友認出。

雖然被網友彈佢頭髮凌亂，造型又麻甩，不過數名熱情粉絲都係追住佢要求合照，佢亦大方親民有求必應，仲企正喺電梯扶手旁，略顯危險，恐阻礙路人步行。有網友指佢哋欠缺安全意識，不過更多網友大讚Jeffrey型英帥靚正，以為佢係邊個男團嘅成員咁靚仔添！