娛圈單打︱倒貼夫家大翻新 絕世老婆唔話得
2024年07月23日 00:01
東網電視
更多新聞短片
![](/hk/bkn/cnt/entertainment/20240723/photo/bkn-20240723000151931-0723_00862_001_01p.jpg?20240723080446)
十優港姐麥明詩下嫁靚仔機師盛勁為後,兩口子愈來愈恩愛。最近盛勁為自爆獲老婆出錢出力翻新父母居所,仲自認係「娘家」大改造添。原來,佢婚前話唔介意人哋叫佢「麥生」係認真喎,「嫁」咗入麥家,連帶父母都受惠,十優港姐認真唔話得!
盛勁為出身基層家庭,自小住在屯門田景邨,努力讀書考入港大,知識改變命運,後來仲邂逅麥明詩締結良緣。十優港姐有見夫家日久失修,老公的兄弟姊妹亦各自成家立室,剩下老爺奶奶居於上址,決定要為夫家大翻新。
盛勁為坦言,「全靠老婆一手策劃推動再搵埋師傅,幾個禮拜就靚仔咗咁多,間屋改造後真係好開揚同好有活力」,仲話爸爸媽媽住得好開心,佢亦想多啲「返娘家」食飯!
哈哈,估唔到靚仔機師都幾幽默喎,個性一啲都唔大男人,難怪麥明詩死心塌地啦。冇誇張㗎,麥明詩對老公可謂一見鍾情,認識不久已認定非君不嫁,後來仲送上名錶主動求婚,可見佢真係愛老公愛到發晒狂。每次鏡頭捕捉到呢對愛侶,都必見麥明詩含情脈脈望住老公,同以前跟林作拍拖,兩者眼神有若天壤之別。
眾所周知,呢位十優港姐出身於中產家庭,一直獲父母悉心栽培,佢亦非常叻女,除咗畢業於劍橋大學,仲做埋港姐冠軍,之後淡出娛樂圈,利用知名度向商界發展,事業愛情兩得意。一個女人有本事又有條件咯喎,莫講話倒貼,養埋老公又有乜所謂,只要真心同開心就得啦!所以呢,盛勁為能夠「嫁」畀麥明詩,唔止生活無憂,仲獲老婆愛屋及烏,真係幾生修到!