邵美琪回巢搞笑孖關禮傑做上等人 張曦雯恨交手偷師
2024年07月23日 00:01
東網電視
更多新聞短片
![](/hk/bkn/cnt/entertainment/20240723/photo/bkn-20240723000158124-0723_00862_001_01p.jpg?20240723080544)
80年代無綫花旦邵美琪,去年獲影迷慶祝其入行40周年,戲癮大作的她月底將與多位靚女後輩拍攝以查案為題材的喜劇,張曦雯直言想偷師,陳瀅則希望多點對手戲。
近年不少昔日花旦相繼回巢無綫拍劇,當中包括佘詩曼、宣萱、楊茜堯等,而多年沒有拍劇的邵美琪(Maggie)本月底亦會返無綫開拍全新喜劇《臥底嬌娃》,劇中演員還有多年來都型爆的關禮傑,2人演名流夫婦,由於演上等人,故Maggie會以高貴造型示人。其他演員還有張曦雯、陳瀅、羅毓儀及馬貫東。現年59歲的Maggie雖然即將「登六」,但多年來保持得相當不俗,上年影迷會更與她大搞入行40周年慶祝活動,而她亦Keep住跟不少圈中好友聯絡,2017年她曾參與無綫《誇世代》拍攝,對上一套則是2019年的《街坊財神》。
今次新劇是查案喜劇,劇中Maggie、關禮傑有一名女兒,由鍾柔美飾演,Yumi劇中做番自己,鍾意唱歌、跳舞,一心想入女團。關禮傑於1987已跟邵美琪合作古裝劇《飲馬江湖》,之後亦都有不少合作,他昨日接受東網獨家訪問時謂:「都有好多部,我哋又喺上海合作過舞台劇《我和春天有個約會》,又去過台灣拍過由馮淬帆監製嘅連續劇,今次佢返嚟大家都好開心,大家都係好朋友,我哋已經試咗造型,大家好合拍、有商有量,期待有火花。」
而陳瀅、張曦雯(Kelly)及羅毓儀為了查一宗毒品案而笑料百出,陳瀅、Kelly趁開工前分別到希臘、泰國旅行,輕鬆一下,2人於社交平台晒相,穿着白色三點式的陳瀅雖然只露背面,卻露出「股邊」,相當「股」惑。說到跟Maggie合作,陳瀅受訪時謂:「非常開心,我好鍾意睇佢啲戲,不過雖然今次係喜劇,但監製同我講我唔係負責搞笑,反而要有實淨嘅一面,好可惜,今次好多演員係未合作過,覺得好新鮮。」而Kelly劇中飾演心理專家,她謂:「今次角色同我平時好唔同,之前拍過啲輕鬆劇,拍時氣氛特別開心,劇中演員都係第一次合作,特別邵美琪,好多年前都曾經見過佢,今次希望可以同佢有多啲對手戲,乘機偷吓師。」
至於年頭奪得「飛躍進步男藝員」的馬貫東被問到受到公司力捧,多次做主角時,他謂:「會把握機會,對自己亦有信心,監製好好,上一套搵我做『衰神』,將我成個人改變咗。」今次劇中飾演臥底的他好有正義感,表面上是花花公子、但內心好多抑壓,馬貫東謂:「劇中講我好打得,又要揸電單車,由於角色需要練大隻,所以呢排狂做Gym操肌,本身自己有運動開,有方法快速大隻,但日日都操到好攰。」