VIVA同場韓國天后BoA　首跳唱新歌High爆音樂節

英皇女團VIVA日前前往澳門出席一個音樂節，與BLACKPINK師妹團「BABYMONSTER」，以及韓國天后BoA等同場，名副其實的星光熠熠，難怪VIVA表現興奮，更率先將月尾才推出的第二首新歌帶上舞台，期間又唱又跳，相當賣力：「真係喘晒氣，每一次跳呢首歌都係挑戰緊體能極限，所以喺韓國受訓時已經不斷咁去操練，返到嚟香港都唔能夠生疏，要積極鍛煉好自己嘅體能。」

談到今次演出，4位成員異口同聲表示：「第一次唱《DTR》呢首新歌，所以好緊張呀，同埋冇諗過現場有咁多觀眾，不過當一企上台，嗰種緊張嘅感覺突然間冇咗，竟然變成興奮，想大家一齊enjoy首歌嘅感覺。」表演期間現場氣氛熱烈，事後更有網民留言：「新歌舞台感十足。」、「啲舞仲跳得好勁！」令她們十分雀躍。VIVA承諾日後會加倍努力回饋樂迷﹕「始終我哋出道只係兩個月，都知道大家對我哋仲未係好認識，但見到咁多朋友留言支持，真係好開心。」