似足帶囡囡相睇 周吉佩唔做「呷醋外父」
2024年07月24日 04:02
東網電視
更多新聞短片
![](/hk/bkn/cnt/entertainment/20240724/photo/bkn-20240724040254922-0724_00862_001_01p.jpg?20240723232931)
歌手周吉佩(吉吉)與太太育有一雙子女,而囡囡包包雖然只是一名小三學生,但已開始擁有一夥少女心,偶像更是冼靖峰(Archie)﹗近日「廿四孝爸爸」吉吉悉心準備為包包預祝生日,更安排Archie驚喜現身,包包眼見偶像出現,二話不說表示﹕「我要同Archie坐﹗」二人不停合照之餘,包包更掏出手機與Archie研究,似乎相當投入「二人世界」。
包包全程笑到見牙唔見眼,更懶理旁人取笑她怕醜,想必這個生日相當難忘。吉吉事後於社交平台上載相關照片及短片開心share,又留言﹕「包姐終於同冼靖峰第一次見面嘞﹗包包好緊張,仲轉少女tone同偶像傾偈(真係頂佢唔順)…再次多謝池仔送呢個生日驚喜俾包姐﹗唔知點解有種阿爸幫個女去約相睇嘅感覺﹗」Archie即回應﹕「包姐開心就好了﹗預祝生日快樂﹗」
吉吉受訪則笑說﹕「其實包包同Archie之前都試過facetime嘞,個女讚Archie好靚仔喎。個女生日我咪問吓Archie嚟唔嚟食飯囉,估唔到佢一口答應,真係俾面。包包一見到偶像,語氣唔同晒之餘,又唔敢望人哋,之後兩個人握手,我咪笑佢返到屋企之後,應該成晚唔使洗手嘞,哈哈﹗(你唔呷醋?)唔會呀,反而覺得幾得意,第一次見到佢有呢個反應咋,大個女嘞。」