娛圈單打︱兩個都係是非多 一人一鑊打和囉
2024年07月25日 00:01
東網電視
更多新聞短片
![](/hk/bkn/cnt/entertainment/20240725/photo/bkn-20240725000126495-0725_00862_001_01p.jpg?20240725075238)
最近有靈異節目出街的梁思浩,忽然成為風頭人物。事緣行姐陳彥行被踢爆秘密誕女,另一半為黃子華司機,梁思浩被認定為頭號爆料嫌疑人;一波未平一波又起,他又在網上節目點名批評楊思琦人前扮可憐,周圍講被女藝人欺凌,實際並無其事。
自派帽醜聞爆發後,思琦妹敗走內地,在港早就冇碇企,不料梁思浩仍然咬實唔放,思琦妹當然被焫㷫。她早前透過社交網反擊,揚言「搞笑,我和他都沒有聯絡,出甚麼頭?笑死」,但梁思浩並未就此收口,再插思琦妹扮可憐係不爭的事實,仲話自己直話直說,對事不對人。
思琦妹絕非省油的燈,喺社交網再次爆Seed,怒斥對方「為做節目,故弄玄虛,說是說非,譁眾取寵」,着大家小心。雙方你一言我一語,十足八婆鬧交咁款。
嗱,本欄就好持平嘅,有人係咪為咗替自己節目搶Fo,不惜做「大嘴巴」四處爆料,有目共睹。好似行姐咁,早就淡出娛樂圈,樂做平凡媽媽,奈何依然不得安寧,搞到佢大動肝火,直斥被相識二十年的朋友出賣。雖然冇人承認自己就係嗰個「二十年朋友」,但外界早已認定呢個大嘴巴就係梁思浩。
把口唔收、大喇叭、是非精、語不驚人死不休,似乎已係梁思浩給予外界的普遍觀感。之但係,思琦妹同樣形象欠佳,觀眾緣欠奉,搞到網民大都樂於食花生,希望雙方再插多幾嘢。唉,都話形象易毀難建,思琦妹又派帽又未婚誕女,之後仲嚟多鑊虛擬老公,連喺內地開Live都話要收錢私聊,是非多多。所以呢,大家打和算啦,Super!