娱圈单打︱畀钱学做女人　搵笨定系吸引

“花曼”王君馨（Grace）自离开TVB后搞作多多，除咗变身跳唱女歌手“G.Racie”外，最近更创办学院，亲自上阵教授“女人训练班”！短短7日课程索价接近两万蚊，认真不菲，唔知上完堂，系咪即刻变成花曼咁索，打得又睇得呢？

Grace话喎，开办学院旨在激励女性，从化妆、发型、造型、仪态、步姿、沟通六大方面提升自信。即系咁，Grace本身系港姐亚军，样貌身材出众；出道初期被评为花瓶，但努力改进演技，《城寨英雄》花曼一角光芒四射，正是其代表作。

咁仲唔止，佢凭此角展露好身手，其后的《铁拳英雄》亦有武打场面，唔止花拳绣腿咁简单。“舞功”同样有番咁上下，早在《舞动奇迹II》已一鸣惊人。离巢后转型做跳唱歌手，证明歌艺亦见得人，加上同老公结婚8年依然恩爱，的确系女人典范。

之但系，课程收费万八，网民就嫌贵，仲问凭甚么？“佢系咪觉得自己好正，啲人要向佢学习？”、“欺骗训练班”！计本栏话斋，提升自信课程万变不离其宗，无非灌输正能量，实行自我催眠；而香港男少女多，确系有唔少待嫁女士，期望透过改造提升竞争力，TVB N年前的《盛女爱作战》都系咁上下嘢。艺人凭知名度吸金无可厚非，值唔值就见仁见智，但Target唔系一众穷L网民就好肯定！

讲到尾，Grace系就系内外兼备，但演艺生涯始终未如人意。TVB时期，等极做唔到女一；离开娘家亦未见突出，星途载浮载沉。唔少艺人都怀住怨气离开，扭尽六壬只为证明大台走宝咋。