關曜儁再做老竇　兒子出世湊夠「好」字

藝人關曜㒞（Leo）與太太迎來第二胎，日前細仔Torres出世，關家上下面對這樁喜事，自然開心不已，Leo更不禁親吻太太及新生兒，場面溫馨。

談到再次榮升父親，Leo笑說﹕「可能真係心靈感應，囝囝出生嗰日，我係由朝早8點開工開到晚上11點嘅，我仲叫咗班好兄弟嚟我屋企幫手切BB床，但因為我太夜收工，返到屋企佢哋已經走晒。我同老婆坐喺度諗住睇江旻憓重劍比賽嘅，點知冇耐太太就見紅，咪送佢入醫院囉。」

Leo指太太一向怕痛，竟然在沒有打針的情況下自然分娩﹕「醫護人員仲話我哋遲啲入院嘅話，BB可能已經等唔切出咗世嘞。太太前後用咗唔夠5分鐘，BB就出世嘞，母愛真係好偉大，後嚟病房仲獲得升級，一切好似自有安排咁。江旻憓比緊賽攞金牌嘅時候，我就喺產房陪緊太太，佢喺我心目中都係冠軍。」他又指待囝囝長大，自己亦會與對方做運動聯絡感情，在產房時曾有一刻幻想BB可能亦有機會當「世一」。