娛圈單打︱中國第一金 小鮮肉誕生
2024年07月30日 00:01
東網電視
更多新聞短片
![](/hk/bkn/cnt/entertainment/20240730/photo/bkn-20240730000115656-0730_00862_001_01p.jpg?20240729225152)
巴黎奧運進行得如火如荼,香港「微笑劍后」江旻憓率先為香港奪得第一金,全城熱血沸騰!同樣令人激動嘅係,國家隊喺射擊10米氣步槍混合團體決賽中,「00後」組合、19歲嘅盛李豪與17歲嘅黃雨婷成功奪冠,成為巴黎奧運揭幕後第一金!盛李豪一出場即令人心心眼,個子高高,容貌討好,冷靜沉着的神槍手姿態絕對殺死人!經此一役,又一個體育明星的誕生!
盛李豪出生於江蘇省張家港市,自細學習射擊,天賦過人,2017年已在訓練中打出60個十環靶紙,教練形容係「到頂」嘅表現,嗰陣佢先得12歲咋!呢位小天才翌年入選江蘇省射擊隊,2019年再下一城入選國家隊;上屆東京奧運男子10米氣步槍決賽嶄露鋒芒,以250.9環獲得銀牌,成為奧運射擊比賽史上最年輕得獎者。媽呀,16歲仔咋!
嗱,國家隊人才輩出,盛李豪雖然叻仔,難免埋沒在一眾師兄師姐的光芒之下,但今屆巴黎奧運就唔同講法,貴為本屆第一金,萬千焦點在一身,就好似漆黑中嘅螢火蟲一樣閃閃發光!
有人就話,叻仔係叻仔,講樣就普通料啫。哈,呢鋪講法真係要戒!呢位小鮮肉身高183cm,先天已有優勢,頂着一頭「都敏俊式」髮型,帶着一點靦覥憨態,就如未經雕琢嘅璞玉,執一執肯定即刻令人眼前一亮!
家陣先至19歲,真係有排佢玩,個人賽奪金再被睇高一線!不過話說回來,運動員幾靚仔都好,千祈唔好飄飄然不務正業,當年「跳水王子」田亮掛住拍戲拍廣告,運動員生涯荒廢,家陣提都冇人提咯。