安芝儇推優惠價格益粉絲　同遊韓國叫價6千

韓國啦啦隊女神安芝儇，有着「最強外掛」美名嘅佢，自去年加入中職台鋼雄鷹Wing Stars後，人氣高踞不下。而去咗台灣發展半年嘅佢，唔止應援演出忙不停，更係各大綜藝節目爭相邀約嘅對象之餘，就連旅行社都睇中安芝儇嘅人氣，合作推出一團4日3夜嘅韓國旅行團，主打可以同女神展開一場特別之旅，而喺5月加盟韓國啦啦隊嘅壯壯及韓國啦啦隊女神金賢姈，亦將於巡迴賽時現身，單人價格為1,150,000韓圜（約6千4百港元）。

雖然4日3夜行程望落相當優惠，但行程中前後2日都係自由活動，且該團不包含機票、旅途保險、房間差額，以及第1日、第4日嘅交通費用，實際可以同女神暢遊嘅日子剩係得2日，且活動剩係得一齊睇比賽、參觀韓國民俗村、愛寶樂園及共進晚餐。此外，該團亦特別註明出團人數最低為20人，若未達出團人數會於2周前通知，但因活動受眾定為外國旅客，因此粉絲需於出發前2周先可以安心買機票，睇嚟想一睹女神風采亦非易事。