娛圈單打︱粉絲望原地結婚 劍神劍后太合襯
2024年07月31日 00:01
東網電視
更多新聞短片
![](/hk/bkn/cnt/entertainment/20240731/photo/bkn-20240731000137781-0731_00862_001_01p.jpg?20240730222138)
嘩,香港係得嘅!繼「微笑劍后」江旻憓歷史性在奧運女子個人重劍摘金後,「香港劍神」張家朗在男子個人花劍決賽中亦寫下歷史,成為68年來成功喺奧運衞冕的第一人!張家朗頂着巨大壓力沉着應戰,更由「決一劍」變成「決三劍」才創下佳績,王者歸來,實至名歸,全城為之沸騰!
好啦,呢對俊男美女都係劍擊「世一」,外界不期然會將二人拉埋嚟講。你知啦,佢哋都係有為青年,都係成就前無古人,加上年齡差不多,粉絲都覺得,如果二人在賽場外都能寫下羅曼史,肯定係全球美談!於是紛紛在社交網寫下「宏願」,希望他們在浪漫花都約會,甚至原地結婚!
哈哈,粉絲都係不理性嘅,之但係呢個不理性的願望一旦成真,又肯定會為全世界所樂見!事實上,張家朗在奪下東京奧運金牌後,一次開live,有網民提議讓江旻憓加入直播,呢位天不怕地不怕的劍神竟然變得怕醜,面紅紅拒絕,似乎怕食檸檬。此後更被隊友「恥笑」,促他向劍后表白。雖然劍神否認暗戀劍后,二人亦冇乜公開交流,而且家朗亦有一位單車港隊女友,跟江旻憓的緋聞不了了之。不過,據悉家朗早前已跟女友分手,劍后亦未聞結交男友,究竟粉絲的願望有冇機會成真呢?
講番今次花劍決賽,落敗的意大利隊深深不忿,又話要抗議賽果,又話要投訴裁判,意粉國的網民更灌爆家朗IG,罵佢偷走金牌。好心啦,家朗要打到「決三劍」先至封王,其實第一劍已應得分,港隊都未投訴黑哨,意粉國有番啲體育精神好冇?