Hebe當街摸同性密友心口被斷正　透視白裙車女上香閨

台灣女子組合S.H.E成員田馥甄（Hebe），入行後感情狀況成謎，早年曾傳佢被台灣天王周杰倫及「金曲歌王」林俊傑力追，不過佢本人就從未公開感情世界，令外界相當好奇。今日（31日）有台灣媒體拍得Hebe疑似「拍拖」照，不過對方卻係其同性密友，Hebe外出期間更一度出手伸到對方胸口上下撫摸，之後齊齊返香閨，成個過程均被曝光。

據指本月15日晚間9點幾，一身透視白裙滲仙氣嘅Hebe，同一名短捲髮女子現身台北某中醫診所門口，Hebe手拎2袋嘢，同性密友則撳住電話齊齊等車。不過等等吓，Hebe突然將左手搭喺同性密友膊頭，繼而下滑到對方心口並上下撫摸，台媒更形容當時情況為「眼神之中滿是關愛，甚至有點含情脈脈」。之後兩人上車，先去購買苦茶，再一同返Hebe香閨。事實上，Hebe曾多次被爆出同女助理過從甚密，不過Hebe從未正面回應。