娛圈單打︱劍后撞樣林志玲 邊個係佢理想型
2024年08月01日 00:01
東網電視
更多新聞短片
![](/hk/bkn/cnt/entertainment/20240801/photo/bkn-20240801000140669-0801_00862_001_01p.jpg?20240731201555)
尋日提到,「微笑劍后」江旻憓(Vivian)喺奧運摘金後,又到「香港劍神」張家朗衞冕成功,兩個劍擊界風雲男女一樣「咁高咁大」,唔少粉絲希望佢哋可以原地結婚!
呢啲畢竟係主觀願望,張家朗亦曾經澄清,佢冇暗戀江旻憓,只係性格比較怕醜啫。所以呢,主觀願望未必可以客觀實現。好啦,咁大家不妨又探討吓,劍后咁高質嘅女仔,會鍾意乜嘢男仔呢?
相信所有香港人都好熟悉啦,Vivian唔止係劍擊界「世一」,仲係學霸一枚,喺美國史丹福大學修讀國際關係,接着攻讀中國人民大學法律碩士,然後入讀中大法律博士課程,希望將來可以喺聯合國工作!仲識得彈琴、彈古箏、跳芭蕾舞,簡直就係文武雙全。咁仲唔止,佢因為膝蓋受傷轉咗食齋,連飲食口味都仙氣過人,加上樣子清麗,笑容甜美,身形高挑,唔少人覺得佢同志玲姐姐撞樣!咁啱兩位女神都有一雙可愛兜風耳,望落確係有幾分相似。
嗱,一般港男冇番咁上下學歷、外貌同家底,可能自慚形穢,遠遠望見劍后已不敢直視,遑論高攀。咁當然,緣來沒法擋,只要劍后情有獨鍾,冇乜事係不可能。Vivian曾透露三大擇偶條件,就係心地善良、具幽默感及喜歡運動。身高178cm嘅佢,反而唔介意另一半身高,矮過佢都冇問題喎。
不過,一眾港男咪沾沾自喜以為有機,皆因劍后最喜歡韓流男神金秀賢,仲自認係《來自星星的你》和《雖然是精神病但沒關係》嘅忠粉!即係話,劍后理想型可能要似足金秀賢咁款,好高標準㗎!