譚嘉儀獲驚喜預祝生日　索爆美國甜心MV造型曝光

今個月13日就會迎嚟35歲生日嘅譚嘉儀，之前表示去洛杉磯登台時順便拍新歌MV，原來係自製生日禮物送畀自己，佢仲自爆搵咗個身高180cm以上嘅美籍男仔做MV主角，不過男主角未曝光，佢就先公開呢份「禮物」嘅單人靚相，靚人靚景令人羨慕。見佢公開嘅MV造型中，一襲大露背小背心加熱褲，白滑美肌不在話下，仲大晒索爆美腿，另一個look就以美國甜心feel登場，挨住古董靚車示人，未睇MV都感受到個American dream，令人期待。

雖然月中先係正日生日，不過佢都已經同一班好友如黃嘉雯、鄧伊婷等預祝生日，見佢上載多張切cake相，原來係一班好姊妹為佢準備驚喜，飯局變慶生P，大大個玫瑰花蛋糕令人心動，譚嘉儀都感動到好似想喊咁，又留言正日要再一齊慶祝多次，睇嚟佢哋成班姊妹情深，認真Sweet爆。