張家朗回港談法國劍手女友：大家見到咩就咩！

成功衞冕男子花劍的「世一」張家朗今日（2日）凱旋而歸，被大批記者及粉絲包圍，衣錦還鄉，號召力十足，但就未見女友、法國劍擊運動員Solène Butruille。對於被踢爆佢同法國女劍手蜜運，佢就未有正面回應：「大家看到甚麼就是甚麼，我亦沒有更多可以告訴大家！」

據知其女友Solène Butruille係一位法國劍手，今屆以「Personal Coach/ Support Personnel（個人教練/支援人員）」身份到巴黎奧運，仲晒出工作證相，雖然佢係法國人，但證件上卻印有「Hong Kong, China」，指甲亦塗上香港區徽圖案，而張相後方就擺有一件「CHEUNG HKG」比賽服同面罩，公開晒張家朗戰衣！Solène Butruille與張家朗同年出生，本身讀醫科嘅佢，亦係法國劍手，2021年同張家朗一齊參加東京奧運而邂逅。