張振朗畀粉絲重重包圍　吳業坤除低眼鏡慘變工作人員

由張振朗、陳自瑤、吳業坤等主演嘅新劇《刑偵12》正喺佛山開工，連日嚟已經有唔少網民捕獲一眾藝人，當中張振朗內地人氣特別高，日前有粉絲影到佢離開拍攝場地時，意外地出現畀女圍情境，非常壯觀！有粉絲現場追星巴時，影到張振朗收工離開，被近20位女粉絲蜂湧而上，將張振朗重重包圍，張振朗雖然被嚇親，不過都笑晒口狂講「多謝」，又友善地同粉絲簽名、合照，有求必應。

不過有眼利網民就發現，與張振朗同行嘅「工作人員」，竟然係冇戴眼鏡嘅吳業坤，而吳業坤都非常識做，見到大批粉絲湧向張振朗，佢就自動波默默行開，期間仲陰陰嘴笑，呢一幕咁啱就被粉絲攝入鏡內。有網民發現後，有人戥吳業坤唔值，話佢行過都無人理，好離譜，不過更多網友笑稱佢冇戴眼鏡先會認唔出：「不戴眼鏡可能難認」、「他的皮膚就係眼鏡，本體無了就認唔出」、「一開始以為邊個靚仔。」