陳奕迅受傷手術後首復出　為軟硬站台High爆全場

組合軟硬昨晚天師於亞博站台，舉行拉闊音樂會，全場坐無虛席並成功鈎起不少樂迷的集體回憶。多年未有合體開騷的軟硬，江湖地位依然甚有份量，邀得正在展開巡唱的草蜢現身又唱又跳，最驚喜是早前打波受傷的陳奕迅（Eason）突然神秘登場，全場立時起哄！

Eason「先聲奪人」亮相，台上歌聲響起才脫下已戴上的外套帽子，現場所見精神十足。期後他更與軟硬合唱歌曲《老人苑》及《重口味殺人事件》，3人毫不留力齊齊起舞娛賓。隨後林海峰笑說：「你首次見人係去食車仔麵，第二次就係今晚正式演出嘛。」Eason接口自嘲：「封番個窿（傷口）唔會漏氣嘞，醫生好好，手工好細緻。」談到工作，他即預告復出：「下個禮拜開始tour。」

由於有可能再舉行《草蜢大戰軟硬part 2》，兩對隊合更於同場表演後於背景字幕留意叫觀眾密切期待。葛民輝開聲意欲招攬Eason說：「想拉埋你入局！」Eason即回應：「做咩呀？想拉低番個年齡層？」令人忍俊不禁。

草蜢現身與軟硬合唱時，蔡一傑自爆明年他㥃成軍40年，林海峰即謂：「咁係咪會申請健力士世界紀錄大全？你哋係鬧交最多及長期都可能拆夥嘅組合 ，但又合作到依家喎。」當蔡一智被爆倘有數個月便「登6」時，蘇志威即謂：「我哋呢度全部加埋300歲嘞，哈哈！」及後全場向蔡一智高唱生日歌，葛民輝打趣：「登6要有啲登記手續喎，你了解完記得call我哋講聲。」台下笑聲不絕。

另外、軟硬更邀來後輩歌手Moon Tang（鄧凱文）、Kiri T（謝曉盈）、

張蔓姿及雲浩影擔任嘉賓，又直言：「預祝明1月1日喺同一個舞台（指樂壇頒獎禮），有啲好離譜嘅事發生喺你哋身上！」而台上軟硬讀出粉絲信時，竟有粉絲寄來當年「東方日報」南極圈的靚女相 ，旁邊附設一首標題《好富貴》的打油詩，原來軟硬以往曾於節目內誦讀過，故炒熱全場氣氛。

完騷後軟硬孖住受訪。談到今次開騷準備比較匆忙。林海峰笑說：「睇奧運幫咗我哋，令我哋有運動員精神拼到最後，運動員有傷患要克服，我哋就克服我哋嘅不足。一直都好擔心大家捱唔捱得到最後。（最驚係跳舞？）唔係，乜都驚，嚟到就驚，走嘅時候又驚塞車，不過唔緊要，我哋逐分逐分追番囉。」

他又不忘多謝Eason及草蜢今次的鼎力支持：「今次所有嘅嘉賓，都係我哋親自打電話邀請佢哋嘅。（事前擔心Eason嘅傷勢有影響？）我唔敢問，只係向佢身邊嘅人打聽，不過如果有通知（唔嚟），都一定會知嘅。（係咪再會同草蜢開騷？）要等草蜢做完巡唱先，我諗緊到佢哋50周年有我哋份啩，哈哈！（睇檔期？）（軟硬）檔期大把，打後幾年都得，主要係睇場地嘅檔期，嚟緊又到葛民輝嘅舞台劇嘞，佢都好忙。」