許廷鏗收身成功　竟然同鄭伊健有關

許廷鏗（Alfred）現身電台宣傳新歌《聆聽世界這分鐘》，節目甫開始，兩位主持程凱欣、麥卓華異口同聲讚嘆：「點解Alfred今日咁有型，明顯收咗身喎！」之前驗出患有嚴重脂肪肝的他，表示重拾健康所以積極減肥：「個肝要搞搞佢，身體上有啲警號，除咗喺飲食上着手，都開始做運動，我做呢個訪問之前，偷咗兩個鐘去打羽毛球，出咗身汗。」又指身邊有很多朋友都熱愛打羽毛球，他笑言：「每次一Call都有8、9人，去到場館就好似輪街症咁等打波。」

Alfred自爆和朋友打比賽，可惜輸了兩場，問到對手是否很強勁？他笑指：「佢哋『符碌』啫！」又透露早前跟隨鄭伊健的健身教練做Gym，對方教他在跑步機上唱歌，認為此法對歌手練氣甚有幫助，同時亦希望運動可以令身形更加fit。