娛圈單打︱速食小鮮肉 天后大報復
2024年08月08日 00:01
東網電視
更多新聞短片
![](/hk/bkn/cnt/entertainment/20240808/photo/bkn-20240808000121010-0808_00862_001_01p.jpg?20240807230240)
韓劇《她很漂亮》女星黃靜茵今年3月驚爆婚變,喺社交網大數高爾夫球手兼企業家老公李英敦出軌,其後更貼出小三照片公開「處決」,怎料竟然點錯相,搞到要向受害女子道歉。當時外界已質疑其精神狀況出問題,估不到上月她又公開新戀情,與小7歲國家隊籃球員撻着。由於跟老公的離婚官司未完,大家都諗緊咁快公開新歡,得唔得㗎?
不過都唔需要擔心太耐,事關呢位韓劇天后話咁快同小鮮肉玩完。嗱,黃靜茵上月下旬先至透過公司認愛,如今不足一個月,又透過公司宣告分手。聲明係咁講的:「黃靜茵最近與一位互有好感並小心翼翼地了解對方的人,決定保持良好的朋友關係。」但凡明星情侶分手,不管關係鬧得幾咁惡劣,當地娛樂圈最興講回復前後輩關係,繼續互相應援等等,其實都係敷衍。黃靜茵速食小鮮肉,來得快去得快,仲兒戲過玩泥沙,網民批評佢係「渣女」、「爽完就走」,你話對形象冇影響就假。
講到尾,韓劇天后都係為愛癡狂,老公出軌對佢打擊極大。睇番佢嘅情史,都唔算特別豐富,入行後跟聲樂男團成員金勇俊交往,愛情長跑9年,期間更一齊亮相真人騷,可惜2015年分手。半年後跟李英敦拍拖,翌年拉埋天窗,至今仔都生咗兩個。
今次同小鮮肉極速玩完,好明顯當對方係愛的替身,填補心靈空虛,順便向老公示威。外界都估緊,天后下一步又會有乜嘢驚人之舉。唉,希望佢唔會步另一女星具慧善後塵,同老公離婚後,被揭係恐怖情人啦!與其繼續放縱,不如正經拍劇,拍番齣好戲好過!