Edan靚車被雀屎「圍攻」　貪玩嚇到肥仔狂嗌

男團MIRROR同ERROR成員同樣出自選秀節目《全民造星》，自然隊員間都有好多交流，尋日（7日） Edan@MIRROR就約埋ERROR成員肥仔同193出街街，見眾人一身波衫運動look，似係約埋去打波，真係勁Friend。不過肥仔就晒出寫上「雀屎安」嘅片，見到Edan好失落咁用紙巾狂抹車頭，原來係Edan將靚車泊喺路邊時，被大量雀屎「圍攻」，搞到佢好心痛咁起勢抹，但都挽回唔到愛車嘅靚樣，所以佢都喺肥仔及193嘅建議下等洗車時先處理。不過期間，Edan就對拍片嘅肥仔作出曳曳一面，忽然用紙巾扮拋向肥仔，仲大嗌：「肥仔畀你！」嚇到肥仔嘩嘩聲，場面搞笑。