鮮娛糧丨陳凱琳揀戒指鄭嘉穎速埋單　更傳疑二度求婚？

前港姐冠軍陳凱琳（Grace）2018年同視帝老公鄭嘉穎結婚，二人婚後育有三子，時不時都會拍片晒幸福，亦因而得到唔少廣告收入，令陳凱琳唔使再出關拍劇都可以生活富裕。近年多以夫妻檔現身嘅二人，最近又被邀請出席品牌私人活動，仲要畀網友喺酒店窗外偶遇甜爆一幕！

有網民指於香港尖沙咀一間酒店偶遇鄭嘉穎同陳凱琳出席活動，鄭嘉穎本身單獨行去玻璃櫃枱，仔細端詳首飾並攞起戒指睇，仲同店員吹水傾到笑晒。轉頭就見到打扮精緻嘅陳凱琳行埋嚟，一身Deep V性感打扮嘅佢，親暱地企喺鄭嘉穎，兩人又店員傾到有講有笑，陳凱琳期間一直戴上戒指唔肯除，又望住老公甜笑，鄭嘉穎個樣被形容為又無奈又寵溺，似乎肯為隻戒指埋單，有網友就大讚佢願意為愛妻花錢，買戒指更似足二度求婚一樣咁冧。而今日（8日）陳凱琳就晒出活動當日嘅靚相，多張合照都見到佢手上戴有大大隻戒指，唔知係咪就係被網友影低買下嘅嗰一隻呢？