娛圈單打︱贏前輸後飛不起 氣質女神食自己
2024年08月09日 00:01
東網電視
更多新聞短片
![](/hk/bkn/cnt/entertainment/20240809/photo/bkn-20240809000149017-0809_00862_001_01p.jpg?20240808224006)
2015年港產片《哪一天我們會飛》令人印象深刻,戲中扮演嫩版楊千嬅的「氣質女神」蘇麗珊一炮而紅。眼大大樣子甜美,笑容冧死仔,加上演戲自然,當時人人都睇好佢事業可以更上層樓。
殊不知10年轉眼過去,呢位女神亦已32歲,再也不是當年的𡃁妹仔。星途亦不如預期璀璨,至今半紅不黑唔湯唔水。電影方面,再無大熱作品爆出;唱歌方面,簽約華納後不獲力捧,近年已被投閒置散。別說聲勢遠遠不如同門的陳蕾,就連今年新人Nancy Kwai的排場都勝過佢,睇見咁嘅局面,唔焦慮就假。
東網獨家報道,蘇麗珊呢兩年嘅工作量及收入每況愈下,又冇新歌,又冇騷出,連廣告都接唔到,近乎食穀種。好彩女神早年有搞吓生意仔,同人合資開按摩店,叫做有啲收入吊吓鹽水咋。面對此情此景,女神可能都要問句:哪一天到我會飛?
嗱,娛樂圈就係咁現實,除咗本身要有條件,亦要講運氣同講手段。蘇麗珊一出道就打響名堂,係威係勢,仲同《哪》片拍檔游學修撻着。之但係,細路女戀愛大過天,如果話有人掛住拍拖而錯失工作,一啲都唔出奇。其後二人分手,點知又逢社運及疫情,香港電影市道極差。女神原本計劃前赴美國留學進修演技,最終都要打道回府返港避疫,事業發展被迫擱在一旁。
好啦,疫後簽約華納以為重新開始,點知樂壇新人輩出,蘇麗珊對觀眾而言早就失去新鮮感。既然新人比舊人更受歡迎,加上冇積極爭取打好關係,公司落閘閂水喉,前浪被後浪掩蓋,都只能嘆句時也命也了!