鍾嘉欣開騷在即感性發文：好多謝你哋一直冇放棄我

藝人鍾嘉欣將於明天（10日）在廣州開騷，她日前已抵達當地為個唱綵排，嘉欣穿上鬆身Tee與運動褲，跟一眾舞蹈員進行排練，見她全程表現投入，非常落力，雖然嘉欣只是薄施脂粉，依然十分漂亮，狀態大勇。另外，嘉欣連日都有在社交網發文及上載短片為個唱造勢，大講開騷前的感受，她感性表示：「我今日第一日嚟到中山紀念堂，心情好興奮，頭先入到去個感受好正，裏面比我想像中大，我好期待之後嘅演唱會，等咗好耐，我對上一次開演唱會係10年前，我真係好多謝觀眾粉絲們同朋友，一直冇放棄我，因為我覺得放棄係好容易，人生可以做到自己鍾意嘅嘢係好難得，我哋唔應該因為我哋結咗婚、生咗小朋友或者搬咗一個好遠嘅地方或者年紀大咗，唔應該因為一啲原因，而唔繼續去做自己鍾意做嘅嘢，我會繼續加油同大家一齊成長。」