張學友隔空互動引哄動　「乒乓嫲嫲」倪夏蓮有回應

巴黎奧運代表盧森堡出戰嘅61歲前乒乓球國手倪夏蓮，早前出戰中國國家隊後輩孫穎莎，展開「嫲孫大戰」，佢笑宮滿面打波並施展「破冰轉身」接波，令人印象深刻，全球爆紅。原來「乒乓嫲嫲」英姿，成功吸引「歌神」張學友，仲喺騷上神複製佢嘅華麗轉身！

倪夏蓮上載影片，cap出張學友日前喺巡迴演唱會杭州站片段，見佢提到倪夏蓮喺奧運上表現瀟灑，具奧運精神，值得自己學習，學友仲即場模仿倪夏蓮「破冰轉身」原地跳名場面，睇到倪夏蓮勁開心，仲直認學友係佢偶像，又讚對方轉身跳起動作比自己更優雅。

倪夏蓮興奮表示好開心以呢個方式同張學友互動：「這兩天我好興奮特別是看到了我們的歌神，巨星張學友在他的演唱會上，學了我的轉圈動作。謝謝他對我的關注和認可，張學友也是我的偶像，他的那首《吻別》啊，讓我百聽不厭，不知道聽了多少遍，是我的最愛之一。」倪夏蓮表示二人同樣年過60，都係一樣為夢想而奮鬥，因此好感動，希望有機會邀請張學友到場睇自己嘅乒乓比賽，倪夏蓮更笑說：「也希望能夠去看他的演唱會，我會很瘋的。」