何依婷劉佩玥內地拍劇樂趣多　大讚粉絲好識做

無綫小花何依婷、劉佩玥現時分別於內地深圳、佛山為新劇《金式森林》及《巨塔之后》拍攝，二人均表現連日來拍攝非常忙碌，但就樂在其中，家有愛貓的依婷因連續15天於內地開工，故日前專登返港一天探望寶貝，她接受東網受訪時笑言:「今次係我第一次返內地拍劇，同成班演員返去其實好好玩，呢度叫外賣好方便，所以我哋經常加餸。」

向來有打高爾夫球的她前日拍了打波戲份，坦言真的好熱，她謂:「平時打一場都要4個鐘，但我哋因為要呈現好多角度，都拍咗4、5個鐘，同埋平時打完一球會上番車，曬住嘅時間唔多，但拍劇嗰陣好少機會上車，太陽曬到好熱，我都準備咗好多消暑百寶，冰袋、凍飲都有。」她又指拍攝時都有帶私伙球桿，笑言平時用得，拍劇都用得着，乜都抵晒。

至於劉佩玥受訪時謂:「雖然上到嚟日日開工都無乜時間去玩，但每日拍攝都好開心，成班人一齊開工好團結、好認真，呢度啲粉絲都好熱情呀，我記得有一晚我哋拍全晚外景，佢哋就睇足全程，但大家都好合作，無影響拍攝進度同環境，我哋中間有時間休息佢哋都好乖比空間我哋，真係好nice！」