李麗珍遭女兒爆是「外貌協會」 認愛小朋友但唔急抱孫
2024年08月10日 19:09
東網電視
更多新聞短片
![](/hk/bkn/cnt/entertainment/20240810/photo/bkn-20240810190922850-0810_00862_001_01p.jpg?20240810190922)
藝人李麗珍(珍妹)偕女兒許倚榕今日(10號)首度以「母女檔」出席速剪髮店剪綵活動,同場還有陳婉衡、簡淑兒及麥長青。
珍妹表示囡囡自少由她操刀剪髮,但直至她11歲為止:「佢11歲後就唔畀我點佢個頭。」許倚榕即謂交由專業人士負責,不過就讚媽咪手藝不錯。珍妹又話現時由囡囡教她扮靚,但囡囡就話很少親自為媽媽化妝,怕技術不專業,有損媽咪靚樣。談及囡囡很有做藝人潛質,她直指囡囡比她更忙,但主力從事幕後創作工作,而她也不想囡囡發展幕前:「做過藝人知道嗰種辛苦,要承受高低起跌嘅壓力,況且佢都唔係好想。」
問到囡囡可有拍拖?珍妹初時着傳媒問囡囡,但其後又忍不住爆分別見過囡囡兩位男友:「我睇樣嘅,覺得幾好。」囡囡即指媽咪是「外貌協會」,珍妹重新也會注重人品。問到她可捨得嫁女?許倚榕即說:「都要嫁人架,(拍緊拖?)今日都係講番活動嘢啦。」珍妹續說自己都鍾意小朋友,不過不心急抱孫,相信是幾年後的事,但湊孫也不會全職湊,因怕太辛苦。
同場還有藝人陳婉衡和好友簡淑兒齊出席剪綵活動,陳婉衡表示近期忙旅遊,不過相當「黑仔」,因為往歐洲期間,一個行程兩度被航空公司寄失行李:「去同返嗰程都唔見咗箱行李,搞到我冇衫換,冇妝化,要全程素顏,好彩喺手提行李仲有幾條底褲,否則連底褲都冇得換,返到香港先寄番啲行李畀我,依家學精咗,一定要放底褲喺手提行李度。」問到旅程中可有艷遇,她即說沒有,因和感情穩定的男友同行。
她又指因為外遊,而好友簡淑兒之前分別飛往美國、泰國及日本公幹,所以有一段時間沒見面,當簡淑兒知道好友寄失行李之苦時,就表示聽機師男友麥大力所說,就算向航行公司投訴亦於事無補:「所以上機時要小心啲,check清楚啲條款,因為寄失行李經常發生,航空公司都理唔到咁多。」她又說雖然近月周圍飛,但男友有空檔亦會探班,有謂男友好Sweet,她就說:「佢都鍾意飛,否則唔會做機師。」