歸綽嶢不捨蘇麗珊離巢:唔覺得公司有偏心
2024年08月11日 17:26
東網電視
更多新聞短片
![](/hk/bkn/cnt/entertainment/20240811/photo/bkn-20240811172632868-0811_00862_001_01p.jpg?20240811173920)
歌手歸綽嶢 ( Nancy Kwai)偕唱作歌手吳林峰今日(11日)在圍方舉行音樂會,吸引逾百歌迷入場。Nancy對於有傳因唱片公司投放大量資源在她和其他年輕歌手身上,令林欣彤及蘇麗珊意興闌珊先後離巢,她覺得公司對每位歌手一視同仁 ,作風公平公正,沒有偏心成份,她說:「佢哋離開係個人選擇,其實喺公司都見過兩位師姐,我同蘇麗珊比較熟,因為我哋係一齊跑馬拉松嘅跑友,有時又一齊食嘢,佢離開梗係唔捨得,但因為佢冇同我提過想離開,我亦都唔知,所以冇機會挽留佢。」今年已推出了兩首歌的她,現時正籌備第3首歌,但會否推出第4首則視乎情況:「因為我啲歌係有主題,圍繞春夏秋冬同花語,要配合到題材先可以推出。」
同場的吳林峰被問到MIRROR成員Jeremy曾找當社工的他傾心事,他直認:「我真係社工,做咗兩年,依家都有續牌,不過我想追夢先做歌手,其實我只係同Jeremy傾吓偈,勸佢唔好太在意人哋點睇佢啫,都唔係話開解佢。(仲有邊位搵你傾偈?)Jer同Stanley,Stanley嗰次係因為同佢寫有關媽咪嘅歌,佢唔係好放得低過身嘅媽咪,Jer就純粹傾閒偈。(幫咗佢哋大忙?)唔可以咁講,佢哋都幫咗我,佢啲粉絲都聽我歌,等我可以喺台上企多1分鐘。」有指他升呢為「娛圈社工」,他則表現怕怕說:「可以打畀我傾,但唔好太夜,因為我都有自己人生,我唔開心時會打機發洩或者同女朋友呻吓囉。」