郭富城紅館騷開鑼　方媛帶愛女High足全場

「舞台王者」郭富城（城城）的共13場「 郭富城 ICONIC世界巡迴演唱會2024–香港站」13號晚假紅館開鑼，除太太方媛帶同兩名寶貝女現身外，還有好友袁詠儀和老公張智霖、溫碧霞一家三口、少爺占、無綫高層樂易玲、蔡一智夫婦等捧場，全場爆滿。

城城個唱的三面台上，台中有高度達天花板的巨型LED螢幕，而左右再加兩個螢幕，打造成180度長幕牆，令場內每個角落的觀眾都欣賞到城城演出，還有能開合的方塊凱旋門機關及升降台，加上燈光投射，營造成千變萬化的視覺效果。戴了金白色攣假髮的城城在14位舞者陪同下登場跳唱個唱主題曲《EXIT》，他表示：「大家好嗎？8年終於可以返嚟呢個舞館，呢個殿堂級嘅紅館為大家表演，好掛住大家，演唱會原本叫《ICONIC EXIT》，但開會後，同事話有一個標誌性出口，擔心誤會我要退休，我緊係唔想退休，我咁鍾意舞台唔會咁易退休，今次演唱會希望帶畀大家開心，好似開派對咁，希望聽到掌聲，仲有發自內心嘅笑聲，我呢個金色頭髮，大家睇到想唔想笑，帶你去電番個。」

唱到第4首歌時 ，工作人員將兩個氣球綁在城城手臂上，他說：「呢兩個氣球緊係唔係用嚟飛上天，係為配合之後首歌。」唱出《木偶襲地球》時還扮木偶，城城又問觀眾鍾意睇3還是4面台，有觀眾大叫4面台，他就話：「我覺得4面台同觀眾好遠，只係睇到我Pat Pat ，依家3面台，山頂嘅觀眾都睇到我。」之後大螢幕播出鐵甲奇俠造型的城城，而他換上有閃燈的盔甲裝的他跳唱《無忌》，城城話：「10幾年冇唱呢首歌，我件衫好特別同燈牌一樣，講真跟住落嚟唱咩歌好，其實好多歌迷係陪住我成長， 我諗住唱三首失戀歌 ，聽咗會好想喊嗰種，等我培養吓情緒先。」到唱《純真傳說》時， 城城蒙眼演出，在升降高台上又唱又跪地，台下觀眾也戥「離地」的他感牙煙。

近年醉心書法及畫畫的城城，在演唱會中再創先河，邊唱《飛》時，邊首次在個唱上即席揮毫表演潑墨畫，展示另一方面才華，他先用拐杖在畫紙上用黃色畫上第一筆，之後用綠及藍色油彩潑墨，不消幾分鐘就完成抽象作品，最後在畫上簽名作結，令觀眾相當驚喜。城城表示：「呢8年覺得自己進步咗很多，呢8年大家都經歷咗，好多時出唔到街，令我開始鍾意咗中國同西洋畫，因為覺得線條好靚，自己今晚好大膽喺呢個舞台上表演畫畫，正值疫情時，我做唔到自己嘅創作，換咗另一啲創作，剛剛啱啱係大螢幕上有啲畫面、圖案就係我畫，係記載住我2024年8月13日喺紅館同大家分享我嘅作品，我希望將來有機會同大家分享到我一啲畫作，一樣都係我創作， 四合作一，歌、舞、字、畫，好唔好？」完成畫作後，城城的褲及鞋也沾染了油彩。

好戲在後頭，半億打造的魔幻舞台終於曝光，台上的機關啟動後，「AK（Aaron Kwok）城堡」空降在紅館中，而戴上皇冠的城城就坐在城堡中的寶座上，於17位舞者的陪舞下在獻唱《國王的新歌》，之後全程在半空的舞台上，跟一批又批的舞蹈員跳唱經典快歌。緊接「AK城堡」登陸台上，城城再獨佔另一升高了的小型舞台跟12位舞者鬥舞，最後沿斜台滑落主舞台。

全晚不停變髮的城城又換上不規定的髮型，他說：「呢啲髮型令我無所適從，我裡面嘅髮型係點，或者完騷先睇到，其實呢個髮型好辛苦，好似窗簾咁，乜都睇唔到，等我撥咗啲窗簾先。」他又突然變得感性，話自己好感動：「隨時可以喊得出，但當然唔會啦，呢啲叫情緒管理，將動力和感情放喺作品中，我嘅作品都有血有汗有感情，呢個就係我，我有時唔識表達，有時好直得罪人都唔知，但唔緊要，歌迷支持我就得，乜都不重要，當然除咗我家人，包括太太和兩個女兒，8年前同佢結婚，當時我仲係小伙子，依家已經唔同，成熟和沉穩咗，係一個丈夫和爸爸，會繼續學習，同繼續和大家表演。」唱出《愛是全奉獻》憑歌寄意，感激家人。

城城又謂創作了一首歌《您》，並首度獻唱送給入場觀眾，還一口氣展示了30張自創書法，又謂：「代表咗我對每位歌迷呢30年嘅紀念同一啲印記，希望永遠留喺我心裡面同工作室裡面， 當有日見唔到你哋，我會攞呢啲字畫出嚟去感受你哋，每幅字畫內面嘅『您』字係代表1年，有30張代表30年，希望將我寫落嚟嘅嘢喺我老咗，喺舞台上冇法表現時，呢啲就係我最好嘅回憶，所以喺呢度好衷心多謝你哋畀咗好多支持我，喺呢個舞台上30年。」演唱會近尾聲時 ，城城以真髮示人和約30位舞者謝幕及鳴謝台前幕，最後發動全場觀眾齊做出其《EXIT》內的動作，大玩萬人人浪，炒熱全場，個唱於晚上11時35分結束。