呂爵安陳凱詠MV演過氣情侶 鏡頭後笑料不斷
2024年08月14日 21:47
東網電視
更多新聞短片
![](/hk/bkn/cnt/entertainment/20240814/photo/bkn-20240814214753777-0814_00862_001_01p.jpg?20240815174126)
男圑MIRROR成員Edan(呂爵安)與陳凱詠 (Jace)首度合作推出合唱情歌《漸漸我們》,在MV中兩人深情演繹過氣情侶,不過鏡頭後,老友鬼鬼的兩人笑料不斷,令現場籠罩歡樂氣氛。Edan與Jace的總予人開心感覺,但推出深情歌曲,就連Jace也摸不着頭腦:「我開頭都話唔想咁深情,可以輕鬆啲開心啲,甚至唱跳,點解要咁深情?」Edan自解謎團道:「開頭都討論咗一段時間咩方向,有試過想R&B、唱跳或者情歌,同監製T-ma都傾過,佢都真係整咗唔同嘅demo畀我哋,最尾揀咗呢首最容易入腦、最有感染力嘅歌,同埋香港好耐都冇呢種男女合唱情歌,覺得係個好嘅機會推出,下次再玩其他啦!」
二人最近才合演《拉闊音樂會》,但其實Edan於3年前已跟她結緣,Edan回憶道:「音樂會再對上一次嘅合作係《激安百貨》,但一直都冇諗過音樂上合作念頭。」Jace也補充道:「既然都做得拉闊,就不如做隻合唱歌玩下啦!」Edan也點頭續道:「同得Jace合作當然唔好嘥,同埋過去有合作過,佢都算係一個幾好嘅合作對象,都有少少火花,有少少夾到,就不如把握今次機會。」
在MV中飾演過氣情侶角色,毋須培養情緒就可直接埋位拍攝,Jace表示:「今次MV演出培養感情係唔需要㗎!一埋位就畀到,你見到我哋行嘅步速都冇夾過,竟然都剛剛好!」不過Edan觀察到Jace在拍攝當日的一些微細舉動,忍笑說:「同埋今日(拍攝當日),Jace嘅情緒係100分,見到佢係咁眨眼⋯⋯」她見Edan突然搞鬼也配合搞笑,補充道:「因為我投入角色,見到前度,心情好複雜,唔知點算好,一亂呢就眼都係咁眨。」Edan聽到Jace的答案即回應:「咁下次睇吓Jace喺啲咩場合,會係咁眨眼先!」此時JACE即反問佻皮的Edan:「咁你見到我係咩情感?」Edan也繼續戲言,表示:「我係好豐富地空白,見到前度,就空白晒囉!」
Edan自爆連環遇上不幸失策事情,他說:「其中一個shot係拍我,佢影背脊,但佢對住我扮鬼臉,結果我認唔住笑咗囉,點解佢咁可愛嘅,伸脷喎!」失策事件還包括偷偷與工作人員及其他演員夾定炮製惡作劇,可惜卻失敗了!Edan說:「開製作會議時,突然諗起不如玩吓佢,如果我同MV中佢嘅男朋友仔拖埋手跟住走,睇吓佢咩反應。」結果Jace竟然冇反應!Jace無奈表示:「你哋做得唔夠說服力,如果你哋稍為有多啲進展,我會畀到多啲。點解你可以寓工作於娛樂,咁都整個prank(惡作劇)?你知有啲嘢要還㗎呵!?死梗呀佢。」