娛圈單打︱行過路過咪錯過 法證靚女真係多
2024年08月15日 00:01
東網電視
更多新聞短片
![](/hk/bkn/cnt/entertainment/20240815/photo/bkn-20240815000139624-0815_00862_001_01p.jpg?20240815080414)
萬眾期待的《法證先鋒VI:倖存者的救贖》話咁快開播,上輯大家印象最深刻,肯定係蔡潔呢位最美法醫險遭變態佬關楚耀生劏,睇到大家心肝仔卜卜跳!今輯蔡潔延續上輯角色,帶着身心創傷繼續法醫工作,第二集結尾竟然喺診所重遇關楚耀,搞到觀眾好緊張,成功激起追劇意欲!
關楚耀今次演繹全新角色,長相就跟上輯一樣,搞到蔡潔好不容易平復嘅情緒又起波瀾。本欄就留意到,關楚耀新角色名字叫「冼陽」,仲係開診所嘅醫生,大大個招牌寫住「冼陽醫務所」,霎眼以為係「洗腸醫務所」!其實係咪可以改個好啲嘅名呢?
Anyway,都係講番靚女最開心。第一集大家就見到憑「最美小三」上位嘅「總經理家嫂」王敏奕同黃宗澤晒恩愛,堅係靚女!家嫂皮膚白皙,五官精緻,成個人閃閃發光,點解可以靚成咁㗎!佢仲失驚無神失蹤留下懸念,希望最後返番去Bosco身邊啦。
另一焦點,梗係蔡潔啦。伊人自從成為邵氏旗下藝人後,演出機會一個接一個,呢個法醫角色,都可謂其代表作,集美麗、智慧、善解人意於一身,堪稱完美!蔡潔戲中造型亦非常知性有氣質,令其美貌更加升級,遠勝她在《一舞傾城》嘅大餅臉造型多多聲!仲有呀,網民最愛嘅「大騎樓」郭珮文亦會參演一角,記住落足眼力欣賞啦。
至於憑《媽媽的神奇小子》飾演少年蘇樺偉、勇奪香港電影金像獎「最佳男配角」嘅馮皓揚,飾演王敏奕患自閉症嘅細佬,又做得幾自然喎。不過咁搞法,佢會唔會自此定型為傷健人士專業戶呢?